（二十）
果晚大战过后，因为第二日（礼拜日）朝早约左屋企人饮茶，所以我起身同kenny say个bye就直接走左。
喺搭地铁出番去期间，我数数手指，发现距离kenny去读书只係剩番十日左右，唔知我会唔会喺佢临走前再见多佢一次呢？
过左两日，kenny whatsapp我，问我礼拜六得唔得闲去佢farewell party。其实我预左果个礼拜六日要番去ot，而且同佢啲朋友又唔熟，怕去到会闷，但同时又怕今次唔去就再见唔到佢，天人交战咗之后，我决定问吓佢仲有无其他日子。
我﹕果日我唔firm呀！要加班。你个大忙人！临走前仲有无其他日子得闲食个饭呀？
kenny﹕我礼拜四走，礼拜三晚要陪屋企人食饭，一係我过两日覆你啦。
我﹕好呀！
果两日我真係好忐忑，心谂如果佢话佢再无时间，咁我係咪就无机会再见佢？我有谂过不如我直接同公司讲果两日唔ot，然后同kenny讲我得闲，但果两日ot全世界都番我唔番好似好怪咁；同时我又谂，如果kenny肯为我逼出一啲时间食餐饭，係咪代表我喺佢心入面多少都佔一定地位呢？
到礼拜四，终于收到kenny的whatsapp回覆。
kenny﹕光哥不如我临走之前约打番场波啰？
我﹕好呀…但係我呢个weekend两日都要ot呀！
kenny﹕哦…咁…算啰。
我﹕er…咁你临走前边日得呀？最多我请半日假陪你打波啰！
kenny﹕好呀好呀！光哥你真係好好人。礼拜二你得唔得呀？
我﹕应该无问题。
后来我忽然醒起同kenny识左咁耐都未同佢去睇过戏，决定问佢要唔要睇戏打波直落。
我﹕喂，果日我请下昼假，两三点太热唔想打波住，去睇场戏先好唔好呀？
kenny﹕好呀！咁啱先我都有套戏想睇！
我﹕你想睇边套呀？
kenny﹕我想睇迷你兵团！
我﹕哦你渣主意啦。
kenny﹕好耶～～我之前问我条女睇唔睇佢话幼稚喎，真係好光哥你肯陪我。
我﹕哈哈幼稚咪啱你啰！
kenny﹕咁我买飞同book场。
眨下眼就去到礼拜二，果朝我快快手做晒手上啲工作，然后準时放工然后去戏院同kenny会合。
因为係暑假，加上我地睇套动画片，所以闲日下昼个院都好多小朋友。其实我一路睇一路打喊露，因为套戏真係几幼稚下，果三只黄色怪做啲嘢好鬼无聊，剧情又平淡，但唔明点解全场好多人都笑得好开心，包括kenny…
好彩套戏唔係好长，终于无无聊聊食吓爆谷就咁捱完左。
kenny﹕光哥你觉得套戏唔好睇呀？我见你都无乜点笑ge？
我﹕少少无聊啰！
本章未完，点击下一页继续阅读。
